#YALIYOJIRI>>>WABUNGE WA UKAWA WAANZA MAKEKE BUNGENI.FAHAMU ZAIDI HAPA.

SIKU moja baada ya wabunge wa Kambi ya Upinzani Bungeni kurejea katika chombo hicho cha kutunga sheria, wameibua msuguano na wenzao baada ya michango yao katika Muswada wa Sheria ya Upatikanaji wa Taarifa wa Mwaka 2016, kutofautiana na wenzao wengi.

Wanadai kuwa muswada huo hauna maslahi kwa Taifa, bali unalenga kukandamiza uhuru wa kupata habari kama ulivyoainishwa katika Ibara ya 18 (d) ya Katiba ya Jamhuri ya Muungano ya Tanzania.

Wabunge wa Chama cha Demokrasia na Maendeleo (Chadema), Godbless Lema (Arusha Mjini), Pauline Gekul (Babati Mjini), David Silinde (Momba), Peter Msigwa (Iringa Mjini), Kasuku Bilago (Buyungu) na Mwita Mwikwabe (Ukonga) walioushambulia muswada huo, wakisema una lengo la kuzuia vyombo vya habari visifanye kazi.

Kwa nyakati tofauti, wabunge hao walitofautiana na Muswada huo wakisema hauna maslahi kwa taifa, bali unalenga kukandamiza uhuru wa kupata habari kama unavyoanishiwa katika Ibara ya 18 (d) ya Katiba ya Jamhuri ya Muungano wa Tanzania, inayosema “Kila mtu anayo haki ya kupewa taarifa wakati wote kuhusu matukio mbalimbali muhimu kwa maisha na shughuli za wananchi na pia kuhusu masuala muhimu kwa jamii.”

Baada ya wabunge wengi waliochangia muswada huo tangu asubuhi kupongeza, Lema alilalamikia muswada huo huku akisema sheria zitawahukumu watu wanaoushabikia muswada huo.

“Kwa wingi wenu mtafanikiwa kuupitisha muswada huu, lakini muswada huu hauna jipya zaidi ya kutaka kuvidhibiti vyombo vya habari ambavyo vinapokea taarifa nyingi sana…vyombo vya habari vikiminywa, sisi wabunge wa upinzani tukiminywa, unadhani kutakuwa na nini hapa? Hakika mshahara wa dhambi daima ni mauti,” alisema.